Nike Tiempo Legend 於十二月將會踏入第六代！Tiempo係nike波boot嘅殿堂級，有接近成20年嘅歷史。話說以前著過嘅球員有羅馬利奧，馬甸尼，簡東拿，近啲嘅就有佩魯爾，朗拿甸奴同派路等嘅球星。
Tiempo出名嘅係由傳統嘅袋鼠皮製造，著落舒服球感好。去到今日，Tiempo成為了後衛界嘅寵兒，代表人物就有碧基，沙治奧拉莫斯同謝路美保定等人。小編相信當中嘅原因係Tiempo保護性晌Nike波boot界裡面係最強。
講翻去第六代，Tiempo有革新嘅科技，就係塊袋鼠皮今次係無縫，取而代知係一塊簡單嘅袋鼠皮配以有系統嘅鞋籠。Nike就話呢個設計可以減少以往皮與皮互縫所造成嘅積水同泥，因為呢啲物質會令皮變硬，所以新科技可以話令袋鼠皮革保持柔軟，保持踢球嘅舒服球感。
Tiempo 6 嘅新科技仲有抓襪嘅設計，令波襪同球鞋緊貼，唔容易移位，減少能量因磨擦而消耗，令腳同鞋更一致更受力。此外，Tiempo 6仲有舒適嘅鞋踭設計，Nike話鞋底個踭位設計上會略低過鞋嘅中央，令鞋底更貼近人體結構，令人著落更舒服咁話。
Nike就當然講到好犀利好吸引咁，實際上就當然要等到出咗試上腳先知喇。喜歡Tiempo嘅朋友唔洗等到頸長，Nike公佈咗今年12月1日就有得賣，定價為$210美金(貴個第五代$10美金)，不過香港有無咁update就真係唔知喇！
Reference: nike.com
Search